【深宮計】玲玲出嚟唔睇掌喇！ 貴婦Look搶鏡網民倡扮埋楊貴妃
撰文：陳栢宇
出版：更新：
《宮心計2深宮計》播出兩集已引起熱烈討論，有觀眾側重於對白字詞，亦有人比較留意女角嘅唐代妝容，但我個人比較簡單，我淨係想知大家最期待嘅麥玲玲師傅幾時出場，因為玲玲姐嘅「倩影」係呢套劇其中一個亮點，甚至有網友等唔切，自行腦內補完，幫TVB諗定新版《楊貴妃》角色，麥玲玲做楊玉環，李龍基做李隆基，原版《楊貴妃》（2000）由向海嵐擔正，江華就飾演唐玄宗。
玲玲姐雖然只為《深宮計》客串一幕，但她受訪時笑指自己角色都好重要：「佢哋都話米雪姐係包頭，我就包尾。」
監製邀客串開心到彈起
不過殘酷嘅現實係，仲有排等！玲玲姐接受《香港01》訪問時話：「我大結局（第36集）先出場呀！我同羅霖、張慧儀佢哋做對手戲嘅，我喺劇裏面係貴婦嚟。」其實點解玲玲姐肯山長水遠飛到浙江橫店，只係為咗客串一兩幕拍幾日戲？佢就話：「我不計成本㗎！有得拍就好開心，因為我真係鍾意拍戲，監製（發）短訊搵我叫我客串時，我真係開心到彈起。不過佢就強調我要記熟對白，要一字不漏，一字不改。」
玲玲姐上年6月北上到橫店開工，逗留數天，更拍下一些照片留念。
自費幾千蚊住酒店 冇冷氣熱到醒
咁第一次去橫店開工有咩趣事？玲玲姐就話拍《深宮計》時撞正好多戲好多劇都係喺橫店開工，所以酒店房都好短缺下：「我自己畀錢住差唔多最好嗰間，每晚都瞓瞓下覺得好熱，之後就發現原來佢凌晨4點至朝早10點會熄冷氣，我心諗大拿拿畀咗幾千蚊，冇理由係咁，嗰陣大熱天時30幾度喎，我講完之後，酒店先肯天光熄冷氣。不過嗰度食嘢真係好平，萬歲哂所有人都係千幾蚊。」至於講到網友好想佢做楊貴妃，玲玲姐就笑住話自己都好想試下：「有得做我實做，因為今次個胸唔夠低令大家失望。」
玲玲姐為劇本真心不惜工本，梳頭、化妝都係自掏腰包請來，仲要包機票包食宿，認真唔話得。
+2